Бозлы яңгыр

Бозлы яңгыр ява….
Кемгә икән җәза–
Табигатьне җиңеп барган
Адәмгәме?!
Вакытында буйсынмаган,
Чишенмәгән, киенмәгән
Җиһангамы?!

Әллә ява-ява юк итмәкче
Каргышларны…
Төзәтмәкче ашыгып
Кылган ялгышларны..?
Яңгыр ява һаман,
Аптырый җан…
Ниләр көтә безне…
Кышмы? Ә ник яз?!

Сары яфрак ник
Коелмый агачларда..?
Кичә генә буран иде…
Табигатьнең көйсезлеге
Тәңгәл кебек адәмнәргә…
Кабул итә алмый күңел…–
Бозлы яңгыр ява!

Сүрия МИНГАТИНА