Агачларын кочып бер елый ул,
Ә ботаклар — гүя җилпәзә.
Кешеләргә яну бүләк итеп
Алтын сибеп йөри көззадә.
Алтыннары гади түгел аның,
Йөрәкләрне кисеп үтәрлек-
Хатирәләр тулы шушы мизгел
Бөтен гомереңә җитәрлек.
Безнең гомер үзе алтын мизгел,
Килеп җитә, үтә, югала.
Истәлеккә безнең гомерләрдән
Балаларга сихри моң кала.
Картлык — шатлык түгел, дигән идем,
Картлык- алтын нурга тиң икән.
Яшьлек төпкеленнән күтәрелгән
Хатирәләр сихри моң икән.
Гомер — мизгел, шушы хатирәләр
Мизгел буйлап узган дулкыннар.
Йөрәккәем соңгы сулышта да
Хатирәләр сагынып сулкылдар.
Оркыя ФАСХИЕВА
Октябрь 2018
