Мин буран сорадым

 

Мин буран сорадым февральдән!
Адашыйм янә бер мәртәбә!
Сап-салкын яңгырын бөркеде —
Төн буе… һәм соры иртәмә…

Иртәгә — көртләрдән җил исәр,
Җил исәр җаннарда — кем сизәр?
Февральне чылаткан яңгырда
Сукрана ил тулы үксезләр.

Буранын жәлләде… ят көйгә
Тамчылар биеште түбәдә.
Әллә соң күз яшьле Күкләрем
Битемә иелде үбәргә?

Мин буран сорадым кышлардан —
Ишет син — өшет син — яндырма!
Кем белә? Ни көтәм? Ут йотып —
Февральдә адашкан яңгырда…

Гөлүсә БАТТАЛОВА
28.02.2019

 

 

0 0 vote
Article Rating
Подписаться
Уведомление о
guest
0 Комментарий
Inline Feedbacks
View all comments
0
Would love your thoughts, please comment.x
()
x